شحن الألعاب بالفئات، تأكيد دفع شام كاش تلقائياً، وتسليم عبر المزوّد

فئات وأكواد لكل فئة

بتضيف الفئات للمنتج متل المتغيّرات: 60 شدّة، 325، 660 — أو باقة شهر وسنة — ولكل فئة سعرها. وبتلصق الأكواد لكل فئة لحالها، أو أكواد مشتركة تنفع لكل الفئات. الطلب بياخد كود فئته أوّل، وإذا خلصت بياخد من المشترك، وإذا ما في ولا واحد الفئة بتظهر «نفدت» بصفحة المنتج.

تأكيد دفع شام كاش لحاله

من «الرقمي والنقاط ← تأكيد الدفع» بتاخد رابط خاص بمتجرك، وبتخلّي تطبيق على جوالك (متل MacroDroid) يبعتله نصّ إشعار شام كاش. إذا في طلب شام كاش وحيد ناطر بنفس المبلغ، الطلب بيتأكّد وبيتسلّم المنتج فوراً — حتى لو الإشعار وصل قبل الطلب بشوي. وإذا في أكتر من طلب بنفس المبلغ، رقم المرسِل بيفرّق بيناتهن، وإلا الحوالة بتستنّى مراجعتك — ما منخمّن. المبلغ اللي فوق السقف بيضلّ للمراجعة، والإشعار المكرّر ما بيأكّد مرّتين.

تسليم عبر المزوّد

لخدمات الشحن بالـID بتحطّ رابط مزوّدك وسرّ التوقيع بصفحة المنتج. كل طلب مؤكّد بينبعت للمزوّد مع ID اللاعب بتوقيع HMAC، وإذا ردّ بالتسليم فوراً أو لاحقاً على رابط الردّ، الزبون بيستلم لحاله. وإذا فشل بيوصلك تنبيه وبتقدر تعيد الإرسال من صفحة الطلب.

قراءة محدودة وEPUB

بتقدر تخلّي الكتاب يُقرأ أونلاين لأول كم صفحة بس — السيرفر بيقصّ الملف فما بيوصل للقارئ غير الصفحات المسموحة — وملفات EPUB صارت تنفتح بقارئ المتجر متل PDF.

من تطبيق الجوال

بتطبيق متجري، تعديل المنتج ← «التسليم الرقمي»: بتختار نوع التسليم، ترفع الملفات، تلصق الأكواد لكل فئة، وتربط المزوّد. و«المنتجات الرقمية» بقائمة «المزيد» بتعرض شو ناطر تسليمك ومخزون الأكواد.