مصادر زوار متجرك ومبيعات كل قناة، الزوار النشطون، وروابط الإحالة

من وين بيجوا زوارك؟

صفحة «الزيارات» بتعرض كل قناة لحالها: كم زيارة، كم طلب، قديش مبيعات، ونسبة التحويل. المصدر بينعرف من الرابط اللي فات منه الزائر، أو من الموقع اللي جاب منه (غوغل مثلاً)، أو من متصفّح التطبيق نفسه — إنستغرام وفيسبوك وتيك توك ما بيقولوا للموقع من وين جاي الزائر، بس متصفّحهن بيعرّف عن حالو، فالزيارة بتنحسب للقناة الصح بدل ما تضيع بـ«مباشر».

الزوار النشطون ومسار الزبون

بأعلى الصفحة بتشوف كم زائر بالمتجر هلّق، شو عم يتفرّجوا، وكم واحد منهم عنده أغراض بالسلّة. وتحتها مسار الزبون: زار المتجر، شاف منتج، حطّ بالسلّة، فتح صفحة الدفع، طلب — مع النسبة بين كل خطوة واللي بعدها، فبتعرف وين بيوقفوا الزباين وشو أوّل شي بدّه تحسين.

فرص مبيعات وأوقات الذروة

«فرص مبيعات» بتجمع الكلمات اللي بحث عنها الزبائن بمتجرك وما لقوا ولا منتج — يعني طلب موجود ما عم تلبّيه، أو منتج اسمه غير اللي بيدوّروا عليه. وأوقات الذروة بتبيّن أكتر ساعة وأكتر يوم بيزورك فيهن الناس، فبتنشر قبلها بشوي.

روابط متتبَّعة للمنشورات والستوري

بتعمل رابط خاص لكل منشور أو ستوري — وممكن يفتح على منتج معيّن — وبتشوف قديش جاب زيارات وطلبات ومبيعات. الطلب بينحسب للرابط حتى لو الزبون رجع اشترى بعد كم يوم.

روابط الإحالة والخصم الترحيبي

من «روابط الإحالة» بتعمل رابط باسم واضح لكل مؤثّر أو مجموعة أو صاحب بيروّجلك، بكود من اختيارك وصلاحية وحدّ طلبات إذا بدّك، وبتشوف لكل رابط: زيارات، تسجيلات، طلبات، وإيراد. وإذا فعّلت الخصم الترحيبي، الزبون الجديد اللي بيفوت من رابط إحالة بياخد خصم (نسبة أو مبلغ ثابت) على أوّل طلب، بينحسب لحاله عند تأكيد الطلب.